Святлана Ціханоўская пракаментавала «Люстэрку» забарону на выдачу беларускіх пашпартоў у дыпламатычных установах за мяжой. Палітык паведаміла, што яна і яе калегі праводзяць кансультацыі з урадамі краін, дзе цяпер жывуць беларусы. Гэтае пытанне таксама будзе ўзнятае падчас Генеральнай асамблеі ААН. Дакладных тэрмінаў пачатку выдачы пашпартоў Новай Беларусі палітык пакуль не называе.
Святлана Ціханоўская ўпэўненая, што ўказ Лукашэнкі ад 4 верасня 2023 года азначае адмову афіцыйнага Мінска ад консульскай дапамогі грамадзянам Беларусі.
— Тым самым дзяржава самаўхілілася з яшчэ адной сферы жыцця, дзе мусіць клапаціцца пра грамадзян, — лічыць палітык. — Многія важныя паслугі становяцца недаступнымі — напрыклад, нельга будзе памяняць пашпарт у пасольствах і консульствах. Беларусы, якія не могуць бяспечна вярнуцца ў Беларусь, рызыкуюць застацца без найважнейшага дакумента для легальнага жыцця і працы за мяжой.
Святлана Ціханоўская паведаміла «Люстэрку», што яе Офіс і Аб’яднаны пераходны кабінет праводзяць кансультацыі з краінамі, дзе знаходзяцца беларусы, каб вырашаць праблемы на заканадаўчым і выканаўчым узроўнях. Паводле яе словаў, ужо ў гэтым месяцы пройдуць кансультацыі з Еўракамісіяй, палітык таксама збіраецца падняць гэтае пытанне перад Еўрапарламентам і падчас Генеральнай асамблеі ААН.
— Ужо цяпер Польшча і Літва выдаюць праязныя дакументы — так званыя пашпарты замежнікаў — беларусам, у якіх скончыўся тэрмін дзеяння пашпарта, але ёсць права легальна знаходзіцца ў краіне, — кажа Святлана Ціханоўская. — Таксама мы шукаем рашэнне з легалізацыяй дзяцей беларускіх грамадзян, народжаных пасля 2020 года не ў Беларусі.
Вырашыць праблему можа паскарэнне працэсу працы над пашпартам Новай Беларусі, які быў прэзентаваны ў пачатку жніўня. Але пакуль нават прыблізных тэрмінаў выпуску дакумента і перспектываў яго прызнання ўрадамі замежных дзяржаваў Святлана Ціханоўская не называе:
— Гэта працэс няхуткі, і тут нам патрэбная будзе дапамога ўсіх беларусаў, якія жывуць за мяжой. Нам неабходна будзе заручыцца падтрымкай урадаў краін, дзе жывуць беларусы. Мы спадзяёмся, што пашпарт зможа вырашыць шэраг праблем з легалізацыяй.
Святлана Ціханоўская таксама звярнулася да беларусаў з просьбай не панікаваць і не здзяйсняць неабдуманых учынкаў праз адмову афіцыйнага Мінска выдаваць пашпарты за мяжой:
— Нават калі ваш пашпарт заканчваецца, не варта вяртацца на радзіму, калі вам пагражае пераслед. Бо ніводны дакумент у свеце не варты чалавечай свабоды. Галоўнае — паклапаціцеся пра сябе і сваю бяспеку. Бо людзі — гэта галоўная каштоўнасць Беларусі.
Чытайце таксама
