Чарговага героя, што скардзіцца на негатыўны досвед жыцця ў Еўрасаюзе, прадставіла дзяржаўная прэса Гомельскай вобласці. Гэтым разам прапагандысты сабралі цэлы брыфінг, каб прасоўваць наратыў пра тое, як кепска беларусам на Захадзе, вуснамі эканамісткі-бухгалтаркі «Гомельэнерга» Ганны Палеевай, піша «Флагшток».
Гамяльчанка пераехала на пастаяннае месца жыхарства ў Германію ў лістападзе 2022 года. З легалізацыяй праблем не ўзнікла, бо ўсе сваячкі жанчыны па бабулінай лініі — «спадчынныя немцы». Ганна наведвала краіну яшчэ ў падлеткавым узросце, гасцявала ў блізкіх.
Перад пераездам жанчына звольнілася з працы і прадала нерухомасць у Беларусі. У Германіі сям’я пасялілася ў горадзе Браўнсбедра ў зямлі Саксонія-Анхальт.
Гамяльчанка ў змрочных тонах апісала паўгода свайго жыцця ў Германіі — нягледзячы на тое, што ў межах спецыяльнай праграмы сям'і бясплатна далі трохпакаёвую кватэру і выдавалі дапамогу, якой хапала на жыццё.
Але «ўвечары, ідучы вуліцай, заўважалі, што ў вокнах не гарыць святло — людзі не ўключаюць яго з мэтай эканоміі, бо за камунальныя паслугі трэба шмат плаціць», скардзілася гамяльчанка. А таксама — на тое, што трэба пацвярджаць дыплом, каб уладкавацца па спецыяльнасці, і вучыць мову, а «калі няма страхоўкі, у медустанову няма сэнсу звяртацца».
«Менш чым праз паўгода сям’я была вымушаная вярнуцца ў Беларусь», — расказалі пра гераіню ў сюжэце ТРК «Гомель».
Пасля таго як гісторыю Ганны апублікавала ў сябе ў Instagram газета аблвыканкама, карыстальнікі сацсеткі пакінулі шмат каментароў, высмеяўшы заявы гамяльчанкі:
«А ў Беларусі кім вас возьмуць без адукацыі і без ведання мовы?»
«Так, сапраўды! Каб жыць бясхмарна ў Германіі, трэба ведаць нямецкую мову? З чаго б гэта раптам? Дзяўчына, мабыць, у ГДР ехала па бясхмарнае жыццё, але трошкі спазнілася!»
«Што за трызненне. Працы цэлая куча і без мовы, і без адукацыі. Незразумела, чаго чакаць курсаў [моўных], калі можна і за свой кошт пайсці ды вывучыць. А за бясплатна — вядома, стойце ў чарзе».
«А чаканне было прыехаць у іншую краіну і без мовы і адукацыі атрымаць бясхмарнае жыццё? Гэта як наогул? Калі замежнік у РБ прыедзе без мовы і адукацыі?»
«У Германіі немагчыма жыць без медстрахоўкі, гэта забаронена законам. Усе людзі застрахаваныя альбо дзяржаўнай, альбо прыватнай страхоўкай. Праблема трапіць да доктара ёсць, калі ў цябе дзяржстрахоўка. Але тут любы чалавек, незалежна ад статусу і становішча, атрымлівае меддапамогу ў найлепшых клініках у выпадку неабходнасці.
Бабулі майго мужа было 86 гадоў. Ёй у Шарытэ зрабілі цяжкую аперацыю на сэрцы. Мы нічога не даплачвалі. А мая мама ў РБ прыйшла да доктара — ёй было 58, з галаўным болем, доктарка сказала: ну што вы хочаце, узрост, і адправіла дадому. Так што, вядома, медыцына ў нас выдатная, што ні кажы».
«У вокнах не гарыць вечарам святло, бо людзі вячэраць у рэстаран пайшлі».
Ніводнага каментара ў падтрымку словаў Ганны пад пастамі прапагандыстаў не было — пакуль не паспелі ўключыць адміністрацыйны рэсурс, адзначае «Флагшток».