Бізнес-джэт Gulfstream G650ER, на якім спецпасланец прэзідэнта ЗША Дональда Трампа Стывен Уіткаф прыбыў у Маскву, вылецеў са сталічнага аэрапорта Унукава. Гэта пацвярджаюць звесткі сэрвісу Flightradar24, піша ASTRA.
Паводле інфармацыі іншага сэрвісу — ADS-B Exchange, самалёт з рэгістрацыйным нумарам N103WG, на якім Уіткаф раней прылятаў у Расію для вызвалення амерыканца Марка Фогеля, пакінуў Маскву каля 2.00 паводле мінскага часу.
У чацвер вечарам, як раней заяўляў памочнік Пуціна Юрый Ушакоў, Пуцін мусіў сустрэцца са спецпрадстаўніком ЗША Стывенам Уіткафам. Рабочыя сустрэчы ў Крамлі завяршыліся каля 1.30 паводле мінскага часу, пасля чаго Пуцін скіраваўся ў падмаскоўную рэзідэнцыю Нова-Агарова, паведамляе дзяржаўная радыёстанцыя «Маяк».
Тэлеканал РЕН-ТВ паведаміў, што Уіткаф наведаў амбасаду ЗША ў Маскве, прабыў там каля гадзіны і потым пакінуў яе. Пазней газета «Известия» апублікавала кадры, на якіх, як мяркуецца, яго картэж скіроўваецца Кіеўскай шашой у бок аэрапорта Унукава.
Пры гэтым, паводле памочніка амерыканскага прэзідэнта па нацыянальнай бяспецы Майка Уолтца, Уіткаф усё яшчэ знаходзіцца ў Маскве і перадае ў Вашынгтон інфармацыю, якая можа дапамагчы прэзідэнту Трампу прыняць далейшыя рашэнні.
«Я размаўляў са сваім калегам, спецыяльным пасланнікам Уіткафам. Ён знаходзіцца там і перадае інфармацыю, каб мы маглі ацаніць яе, а прэзідэнт Трамп — прыняць рашэнне што да далейшых крокаў», — заявіў Уолтц у эфіры Fox News (цытата паводле ТАСС).